ರಣಬಾಲಿ: ವಿಜಯ್ ದೇವರಕೊಂಡ ಸಿನಿಮಾಗೆ 2ನೇ ದಿನ 7.17 ಕೋಟಿ ರೂ. ಕಲೆಕ್ಷನ್
ಬ್ರಿಟಿಷರ ಕಾಲಘಟ್ಟದ ಕಥೆಯನ್ನು ‘ರಣಬಾಲಿ’ ಸಿನಿಮಾದಲ್ಲಿ ತೋರಿಸಲಾಗಿದೆ. ವಿಜಯ್ ದೇವರಕೊಂಡ ಅವರು ಆ್ಯಕ್ಷನ್ ಹೀರೋ ಅವತಾರದಲ್ಲಿ ಅಬ್ಬರಿಸಿದ್ದಾರೆ. ಚಿತ್ರಕ್ಕೆ ಜನರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಎರಡನೇ ದಿನ ಈ ಸಿನಿಮಾಗೆ 7.17 ಕೋಟಿ ರೂಪಾಯಿ ಕಲೆಕ್ಷನ್ ಆಗಿದೆ. ಬೇರೆ ಸಿನಿಮಾಗಳಿಂದ ಈ ಚಿತ್ರ ಪೈಪೋಟಿ ಎದುರಿಸುತ್ತಿದೆ.
Updated on: Oct 18, 2026 | 8:27 AM
ಟಾಲಿವುಡ್ ಸ್ಟಾರ್ ಕಲಾವಿದರಾದ ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಮಂದಣ್ಣ ಜೋಡಿಯಾಗಿ ನಟಿಸಿರುವ ‘ರಣಬಾಲಿ’ ಸಿನಿಮಾ ಶುಕ್ರವಾರ (ಅಕ್ಟೋಬರ್ 16) ವಿಶ್ವಾದ್ಯಂತ ಬಿಡುಗಡೆಯಾಗಿದೆ. ಚಿತ್ರಕ್ಕೆ ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಸಿನಿಮಾದಲ್ಲಿ ಅತಿಯಾದ ಹಿಂಸೆ ಇದೆ ಎಂಬ ಬಗ್ಗೆ ವೀಕ್ಷಕರಿಂದ ಕೆಲವು ದೂರುಗಳು ಕೇಳಿಬಂದಿವೆ. ಆದರೂ, ಸ್ವತಃ ವಿಜಯ್ ದೇವರಕೊಂಡ ಈ ಚಿತ್ರವನ್ನು ಬೆಂಬಲಿಸಿದ್ದು, ಇದು ಈ ವರ್ಷ ತೆರೆಕಂಡ ಅತ್ಯುತ್ತಮ ತೆಲುಗು ಚಿತ್ರಗಳಲ್ಲಿ ಒಂದಾಗಿದೆ ಎಂದು ಬಣ್ಣಿಸಿದ್ದಾರೆ. ಹಾಗಾದರೆ, ಬಾಕ್ಸ್ ಆಫೀಸ್‌ನಲ್ಲಿ ಚಿತ್ರದ ಕಲೆಕ್ಷನ್ ಹೇಗಿದೆ ಎಂಬುದರ ಸಂಪೂರ್ಣ ವಿವರ ಇಲ್ಲಿದೆ.
ಪ್ರಸಿದ್ಧ ಬಾಕ್ಸ್ ಆಫೀಸ್ ಟ್ರ್ಯಾಕರ್ ‘ಸ್ಯಾಕ್ನಿಲ್ಕ್’ ವರದಿ ಪ್ರಕಾರ, ‘ರಣಬಾಲಿ’ ಸಿನಿಮಾ ತನ್ನ ಎರಡನೇ ದಿನದಂದು 7.17 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಮೊದಲ ದಿನದ ಭರ್ಜರಿ ಗಳಿಕೆ 9.25 ಕೋಟಿ ರೂಪಾಯಿ ಇದ್ದರೆ, ಎರಡನೇ ದಿನ ಕಲೆಕ್ಷನ್ ಸ್ವಲ್ಪ ಕುಸಿದಿದೆ. ಇದರೊಂದಿಗೆ ಚಿತ್ರದ ಒಟ್ಟು ಎರಡು ದಿನಗಳ ಗಳಿಕೆ 16.42 ಕೋಟಿ ರೂಪಾಯಿ ತಲುಪಿದೆ. ವೀಕೆಂಡ್‌ ಆರಂಭದಲ್ಲಿ ಸಿನಿಮಾದ ಗಳಿಕೆ ಗಣನೀಯವಾಗಿ ಹೆಚ್ಚಾಗಲಿದೆ ಎಂದು ನಿರೀಕ್ಷಿಸಲಾಗಿದ್ದರೂ, ಎರಡನೇ ದಿನ ಕಲೆಕ್ಷನ್‌ನಲ್ಲಿ ಇಳಿಕೆ ಕಂಡುಬಂದಿರುವುದು ಚಿತ್ರತಂಡಕ್ಕೆ ತುಸು ಚಿಂತೆ ಉಂಟು ಮಾಡಿದೆ.
‘ರಣಬಾಲಿ’ ಚಿತ್ರಕ್ಕೆ ಮಿಶ್ರ ವಿಮರ್ಶೆಗಳು ವ್ಯಕ್ತವಾಗುತ್ತಿದ್ದರೂ, ‘ಅರ್ಜುನ್ ರೆಡ್ಡಿ’ ಮತ್ತು ‘ಅನಿಮಲ್’ ಖ್ಯಾತಿಯ ನಿರ್ದೇಶಕ ಸಂದೀಪ್ ರೆಡ್ಡಿ ವಂಗಾ ಅವರು ಈ ಚಿತ್ರವನ್ನು ಮತ್ತು ವಿಜಯ್ ದೇವರಕೊಂಡ ಅವರ ನಟನೆಯನ್ನು ಮುಕ್ತಕಂಠದಿಂದ ಕೊಂಡಾಡಿದ್ದಾರೆ. ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ತಮ್ಮ ವಿಮರ್ಶೆಯನ್ನು ಹಂಚಿಕೊಂಡಿರುವ ಅವರು, ವಿಜಯ್ ಭಾರತೀಯ ಸಿನಿಮಾದ ಮುಂದಿನ ಆ್ಯಕ್ಷನ್ ಹೀರೋ ಆಗಿ ಹೊರಹೊಮ್ಮಲಿದ್ದಾರೆ ಎಂದು ಪ್ರಶಂಸಿಸಿದ್ದಾರೆ.
‘ವಿಜಯ್… ನಿಮ್ಮ ಆ್ಯಕ್ಷನ್‌ನಲ್ಲಿ ಒರಟಾದ ಮತ್ತು ಸಹಜವಾದ ಉಗ್ರತೆಯಿದೆ, ಅದನ್ನು ಕೃತಕವಾಗಿ ಸೃಷ್ಟಿಸಲು ಸಾಧ್ಯವಿಲ್ಲ. ನೀವು ಹೋರಾಡುವ ರೀತಿಯಲ್ಲಿ ಬೆಚ್ಚಿಬೀಳಿಸುವ ತೀವ್ರತೆಯಿದೆ’ ಎಂದು ಬರೆದುಕೊಂಡಿರುವ ಸಂದೀಪ್ ರೆಡ್ಡಿ ವಂಗಾ, ‘ನೀವು ಭಾರತೀಯ ಸಿನಿಮಾದ ಮುಂದಿನ ಖ್ಯಾತ ಆ್ಯಕ್ಷನ್ ಹೀರೋ ಆಗಲಿದ್ದೀರಿ ಎಂದು ನಾನು ಬಲವಾಗಿ ನಂಬುತ್ತೇನೆ. ನಿಮಗೆ ಅಭಿನಂದನೆಗಳು’ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ರಶ್ಮಿಕಾ-ವಿಜಯ್ ನಟನೆಯ ‘ರಣಬಾಲಿ’ ಹೇಗಿದೆ? ಇಲ್ಲಿದೆ ಟ್ವಿಟ್ಟರ್ ವಿಮರ್ಶೆ
ರಾಹುಲ್ ಸಂಕೃತ್ಯನ್ ನಿರ್ದೇಶನದಲ್ಲಿ ಮೂಡಿಬಂದಿರುವ ‘ರಣಬಾಲಿ’ ಸಿನಿಮಾವನ್ನು ‘ಮೈತ್ರಿ ಮೂವೀ ಮೇಕರ್ಸ್’ ಸಂಸ್ಥೆಯು ನಿರ್ಮಿಸಿದೆ. ಕಳೆದ ಫೆಬ್ರವರಿಯಲ್ಲಿ ಉದಯಪುರದಲ್ಲಿ ಅದ್ದೂರಿಯಾಗಿ ವಿವಾಹವಾದ ಬಳಿಕ ವಿಜಯ್ ಮತ್ತು ರಶ್ಮಿಕಾ ಒಟ್ಟಿಗೆ ನಟಿಸಿದ ಮೊದಲ ಸಿನಿಮಾ ಇದಾಗಿದೆ. 2018ರ ‘ಗೀತ ಗೋವಿಂದಂ’ ಮತ್ತು 2019ರ ‘ಡಿಯರ್ ಕಾಮ್ರೇಡ್’ ಬಳಿಕ ಈ ಜೋಡಿಯ 3ನೇ ಚಿತ್ರವಿದು.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
