Fake Medicine: ರಾಮನಗರ ನಕಲಿ ಔಷಧ ಜಾಲ: ಪೋರ್ಟರ್’ ಆ್ಯಪ್ ಮೂಲಕ ನಡೆಯುತ್ತಿತ್ತು ಸಪ್ಲೈ!
ರಾಮನಗರದ ದೊಡ್ಡೇರಿ ಗ್ರಾಮದ ಫಾರ್ಮ್‌ಹೌಸ್‌ನಲ್ಲಿ ನಡೆಯುತ್ತಿದ್ದ ನಕಲಿ ಔಷಧ ತಯಾರಿಕಾ ಜಾಲದ ಸ್ಪೋಟಕ ವಿವರಗಳು ಬಯಲಾಗಿವೆ. ಖಾಸಗಿ 'ಪೋರ್ಟರ್' ಆ್ಯಪ್ ಮೂಲಕ ಪ್ರತಿವಾರ ನೂರಾರು ಬಾಟಲಿ ನಕಲಿ ಔಷಧಗಳನ್ನು ಸರಬರಾಜು ಮಾಡುತ್ತಿದ್ದ ಕಿಂಗ್‌ಪಿನ್ ಪ್ರಶಾಂತ್ ತಂತ್ರ ಹಾಗೂ ಪೊಲೀಸರ ಕಾರ್ಯಾಚರಣೆಯ ಸಂಪೂರ್ಣ ಮಾಹಿತಿ ಇಲ್ಲಿದೆ.
Updated on: Aug 22, 2026 | 10:34 AM
ಮುಖ್ಯಾಂಶಗಳು
- ರಾಮನಗರ ಫಾರ್ಮ್‌ಹೌಸ್‌ನಿಂದ ಪೋರ್ಟರ್ ಆ್ಯಪ್ ಮೂಲಕ ನಕಲಿ ಔಷಧ ಸರಬರಾಜಾಗುತ್ತಿತ್ತು.
- ಬೆಂಗಳೂರಿನಲ್ಲಿ ಕುಳಿತು ಪ್ರಶಾಂತ್ ಪ್ರತಿ ವಾರ ನೂರು ಬಾಟಲ್ ಬುಕ್ ಮಾಡುತ್ತಿದ್ದ.
- ಸ್ಥಳೀಯರ ಅನುಮಾನದ ಮೇರೆಗೆ ದಾಳಿ ನಡೆಸಿ ನಕಲಿ ದಂಧೆಯನ್ನು ಪೊಲೀಸರು ಬಯಲುಗೊಳಿಸಿದರು.
ರಾಮನಗರ, ಆಗಸ್ಟ್ 22: ರಾಜ್ಯಾದ್ಯಂತ ಭಾರಿ ಸಂಚಲನ ಮೂಡಿಸಿದ್ದ ನಕಲಿ ಔಷಧ ತಯಾರಿಕಾ ಜಾಲದ ತನಿಖೆಯನ್ನು ಇತ್ತೀಚೆಗಷ್ಟೇ ಎಸ್‌ಐಟಿ (SIT) ವಹಿಸಿಕೊಂಡು, ಮುಖ್ಯ ಸೂತ್ರಧಾರ ಪ್ರಶಾಂತ್ ವಿರುದ್ಧ ಲುಕ್‌ಔಟ್ ನೋಟಿಸ್ ಜಾರಿ ಮಾಡಿತ್ತು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗ ಮತ್ತೊಂದು ಸ್ಪೋಟಕ ಮಾಹಿತಿ ಲಭ್ಯವಾಗಿದ್ದು, ರಾಮನಗರದ ದೊಡ್ಡೇರಿ ಗ್ರಾಮದ ಫಾರ್ಮ್‌ಹೌಸ್‌ನಲ್ಲಿ ನಡೆಯುತ್ತಿದ್ದ ನಕಲಿ ಔಷಧ ದಂಧೆಯ ಕರಾಳ ಜಾಲ ‘ಟಿವಿ9’ಗೆ ಲಭ್ಯವಾಗಿದೆ.
‘ಪೋರ್ಟರ್’ ಆ್ಯಪ್ ಮೂಲಕ ಡೆಲಿವರಿ, ಬೆಂಗಳೂರಿನಲ್ಲಿ ಕುಳಿತು ಬುಕ್ಕಿಂಗ್!
ಅತ್ಯಂತ ರಹಸ್ಯವಾಗಿ ನಡೆಯುತ್ತಿದ್ದ ಈ ದಂಧೆಗೆ ಆರೋಪಿಗಳು ಖಾಸಗಿ ಡೆಲಿವರಿ ಆ್ಯಪ್ ಒಂದನ್ನು ಬಳಸಿಕೊಳ್ಳುತ್ತಿದ್ದರು. ಕಿಂಗ್‌ಪಿನ್ ಪ್ರಶಾಂತ್ ಹಾಗೂ ಆತನ ಸಹಚರ ವೆಂಕಟೇಶ್, ‘ಪೋರ್ಟರ್’ (Porter) ಆ್ಯಪ್ ಮೂಲಕ ನಕಲಿ ಔಷಧಗಳನ್ನು ಸರಬರಾಜು ಮಾಡುತ್ತಿದ್ದರು. ಬೆಂಗಳೂರಿನಲ್ಲಿಯೇ ಕುಳಿತು ಆ್ಯಪ್‌ನಲ್ಲಿ ಬುಕ್ ಮಾಡುತ್ತಿದ್ದ ಪ್ರಶಾಂತ್, ರಾಮನಗರದ ಫಾರ್ಮ್‌ಹೌಸ್‌ನಿಂದ ಔಷಧ ಪಡೆದು ಎಲ್ಲಿಗೆ ತಲುಪಿಸಬೇಕು ಎಂದು ಸೂಚಿಸುತ್ತಿದ್ದ. ಈ ಮೂಲಕ ಪ್ರತಿ ವಾರ ಕನಿಷ್ಠ 100 ಬಾಟಲಿಗಳಷ್ಟು ನಕಲಿ ಔಷಧಗಳನ್ನು ವಿವಿಧ ಕಡೆಗಳಿಗೆ ರವಾನಿಸಲಾಗುತ್ತಿತ್ತು.
ಫಾರ್ಮ್‌ಹೌಸ್ ಮೇಲೆ ಪೊಲೀಸರ ದಾಳಿ ಹೀಗಾಯಿತು!
ಈ ಹಿಂದೆ ದೊಡ್ಡೇರಿ ಗ್ರಾಮದ ರಹಸ್ಯ ಫಾರ್ಮ್‌ಹೌಸ್ ಬಗ್ಗೆ ಸ್ಥಳೀಯರಿಗೆ ಅನುಮಾನ ಮೂಡಿತ್ತು. ವಾರದಲ್ಲಿ 2-3 ಬಾರಿ ಆ ಫಾರ್ಮ್‌ಹೌಸ್‌ಗೆ ಕಾರು ಬಂದು ಹೋಗುತ್ತಿತ್ತು ಹಾಗೂ ಸ್ಥಳೀಯರಿಗೆ ಯಾರಿಗೂ ಒಳಗೆ ಪ್ರವೇಶವಿರಲಿಲ್ಲ. ಯಾರೂ ಹತ್ತಿರ ಬರಬಾರದು ಎಂದು ಕ್ರೂರ ತಳಿಯ ನಾಯಿಯೊಂದನ್ನು ಸಾಕಲಾಗಿತ್ತು.
ಸ್ಥಳೀಯರು ನೀಡಿದ ಮಾಹಿತಿಯನ್ನಾಧರಿಸಿ ಪೊಲೀಸರು ಕೆಲವು ಸಿಬ್ಬಂದಿಯನ್ನು ಕಳುಹಿಸಿ ಪರಿಶೀಲಿಸಿದಾಗಲೂ ಒಳಗಡೆ ಬಿಡಲಿಲ್ಲ. ಇದರಿಂದ ಶಂಕೆ ವ್ಯಕ್ತಪಡಿಸಿದ ಪೊಲೀಸರು ದಿಢೀರ್ ದಾಳಿ ನಡೆಸಿದಾಗ ಈ ಬೃಹತ್ ನಕಲಿ ಔಷಧ ಜಾಲ ಬೆಳಕಿಗೆ ಬಂದಿತ್ತು.
ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
