Deepavali 2024: ಬೆಳಕಿನ ಹಬ್ಬದ ದಿನ ಕರ್ನಾಟಕದ ಈ ಹಳ್ಳಿಯಲ್ಲಿ ಯುವತಿಯರು ಅಳಲೇಬೇಕಂತೆ, ಏನಿದು ವಿಚಿತ್ರ ಆಚರಣೆ?

ಬೆಳಕಿನ ಹಬ್ಬ ದೀಪಾವಳಿ ದಿನಗಣನೆ ಆರಂಭವಾಗಿದೆ. ದೀಪಾವಳಿ ಎಂದ ಕೂಡಲೇ ನೆನಪಿಗೆ ಬರುವುದೇ ಸಾಲು ಸಾಲು ದೀಪಗಳು. ಈ ಹಬ್ಬವು ಕೆಟ್ಟತನದ ವಿರುದ್ಧ ಒಳ್ಳೆಯತನದ ವಿಜಯವನ್ನು ಸಂಕೇತಿಸುತ್ತದೆ. ದೀಪ ಹಚ್ಚಿ ಕತ್ತಲೆಯ ಅಂಧಕಾರ ಹೊಡೆದೋಡಿಸಿ, ಬೆಳಕಿನ ಜ್ಯೋತಿ ಬೆಳಗುವ ಮೂಲಕ ಬಾಳಗಲಿ ಎಂದು ದೇವರಲ್ಲಿ ಪ್ರಾರ್ಥಿಸಲಾಗುತ್ತದೆ. ವರ್ಷಕೊಮ್ಮೆ ಬರುವ ದೀಪಾವಳಿ ಹಬ್ಬವನ್ನು ಮನೆ ಮಂದಿಯೆಲ್ಲಾ ಬಹಳ ಸಡಗರ ಮತ್ತು ಸಂಭ್ರಮದಿಂದ ಆಚರಿಸುತ್ತಾರೆ.

ಈ ಬುಡಕಟ್ಟು ಜನಾಂಗದ ಆಚರಣೆಯೇ ವಿಭಿನ್ನ

ಆದರೆ ಕರ್ನಾಟಕದ ಈ ಹಳ್ಳಿಯಲ್ಲಿ ಮಾತ್ರ ಹಬ್ಬದಂದು ಕನ್ಯೆಯರು ಕಣ್ಣೀರು ಸುರಿಸುತ್ತಾರಂತೆ. ಇದು ಈ ಜನಾಂಗದ ಸಂಪ್ರದಾಯ ಎನ್ನಲಾಗಿದೆ. ಹೌದು, ಉತ್ತರ ಕರ್ನಾಟಕದ ಗಜೇಂದ್ರಗಡ ಪಟ್ಟಣದಲ್ಲಿ ದೀಪಾವಳಿ ಸಂಭ್ರಮದಲ್ಲಿ ಯುವತಿಯರು ಸಾಂಪ್ರದಾಯಿಕ ಉಡುಗೆ ತೊಡುಗೆ ಧರಿಸಿ, ದೀಪ ಹಚ್ಚಿ, ಗ್ರಾಮದ ಹಿರಿಯರಿಗೆ ಆಶೀರ್ವಾದ ಪಡೆದುಕೊಳ್ಳುತ್ತಾರೆ. ಅಷ್ಟೇ ಅಲ್ಲದೇ ಮದುವೆಯಾಗದ ಕನ್ಯಾಮಣಿಗಳು, ತಮ್ಮ ಸಾಂಸ್ಕೃತಿಕ ಸೊಗಸನ್ನು ಆಚರಿಸಿ, ಅಪ್ಪಿ ಕೊಳ್ಳುತ್ತ ಕಣ್ಣೀರು ಸುರಿಸುತ್ತಾರೆ.

ಇದನ್ನೂ ಓದಿ: ನರಕ ಚತುರ್ದಶಿಯಂದು ಪ್ರೀತಿ ಪಾತ್ರರಿಗೆ ಶುಭ ಕೋರಲು ಇಲ್ಲಿದೆ ಶುಭಾಶಯಗಳು

ಯುವತಿಯರು ಅಳುವುದರ ಹಿಂದಿದೆ ಈ ಕಾರಣ

ಗಜೇಂದ್ರಗಡ ಪಟ್ಟಣದ ಸಾರವು ಲಂಬಾಣಿ ಸಮುದಾಯದ ಮದುವೆಯಾಗದ ಹೆಣ್ಣು ಮಕ್ಕಳು ಹತ್ತಿರದ ಬೆಟ್ಟಕ್ಕೆ ಜೊತೆಯಾಗಿ ಹೋಗಿ, ಲಂಬಾಣಿ ಸಾಹಿತ್ಯದ ಹಾಡುಗಳೊಂದಿಗೆ ಹೂವುಗಳನ್ನು ಸಂಗ್ರಹಿಸುತ್ತಾರೆ. ಅದಲ್ಲದೇ, ಸಗಣಿಯಿಂದ ಹಟ್ಟೆವ್ವನವನ್ನು ತಯಾರಿಸಿ, ಅದನ್ನು ಮನೆ ಬಾಗಿಲಿಗೆ ಇಟ್ಟು ಪೂಜಿಸುತ್ತಾರೆ.

ಹಬ್ಬದ ದಿನ ತಾಂಡಾದ ಸೇವಾಲಾಲ್ ದೇವಸ್ಥಾನದ ಮುಂದೆ ರೋಮಾಂಚಕ ನೃತ್ಯಗಳು ಮತ್ತು ಆಚರಣೆಗಳಲ್ಲಿ ಉತ್ಸವಗಳು ನಡೆಯುತ್ತವೆ. ಮದುವೆಯಾದ ಮಹಿಳೆಯರು ಬೆಳಕಿನ ಹಬ್ಬದಂದು ಈ ಆಚರಣೆಯಲ್ಲಿ ಭಾಗವಹಿಸುತ್ತಿಲ್ಲ. ಮುಂದಿನ ವರ್ಷ ಮದುವೆಯಾದರೆ ಈ ಹಬ್ಬ ಸಿಗಲ್ಲ ಎನ್ನುವ ಕಾರಣಕ್ಕೆ ಕನ್ಯಾಮಣಿಗಳು ತಬ್ಬಿಕೊಂಡು ಅಳುತ್ತಾರೆ ಎನ್ನಲಾಗಿದೆ.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ